Lingua Reta

U situ : apiazzetta

-Chi era a to primura maiò quand’è tu hai dicisu di lancià su blog ?

L’idea ci hè venuta cù un amicu (Sbanditu nant’à u blog). Ci diciamu ch’ellu mancava un situ internet in lingua corsa chì parleria d’attualità, di cose chì ci piacenu, oghjinche. Troppu spessu a nostra lingua hè aduprata per parlà di tradizioni, di u paese, di u passatu, o propiu di lingua corsa : “ind’è mè, u plafond si dice ...” Ghjè bè ma semu cunfinati in un duminiu precisu, di spezialisti di a lingua è pè i spezialisti di a lingua. Giremu in tondu ! S’è no ùn femu ch’è “Tempi fà” è “Dite a vostra”, allora ùn ci la feremu micca à tuccà i giovani, chì oghje sò in magiurità citatini.
Allora avemu fattu a scumessa di cummentà l’attualità, di parlà di cose muderne di manera accessibile : articuli corti è faciuli à leghje. U scopu ùn hè micca di fà un’opera literaria, di circà di sorte parolle è spressioni rare chì sò solu 4 o 5 à cunnoscele in Corsica. Circhemu d’ùn fà micca qualcosa d’elitista, ma chì tuttu ognunu possa leghje è capisce. Certi criticheranu a lingua ch’è no adopremu è i sugetti ch’è no trattemu. Trippa !

-Comu sarà sicondu à te chì ci siani cusi pocu siti in lingua corsa ?

Disgraziatamente ciò ch’ellu si trova nant’à u net hè u spechju di a realità suciale. In carrughju dinù, corsu si ne sente pocu. Ma trovu chì i siti in corsu si sviluppanu. Di quandu in quandu cascu nant’à un novu blog o un novu situ in lingua corsa. Sò stati unepochi st’ultimi mesi. Pocu à pocu si tesse u web in lingua corsa !

-Pudeti parlà ind’a stessa ghjurnata di i vistiti di rachida è di a caccia in paese... comu si faci a scelta di i sughjeti ?

In fatti semu parechji ridattori à scriveci nantu. A scelta di i sughjetti si face segondu l’estru di l’unu è di l’altri. Dipende di l’ispirazione è di l’attualità. Ma avemu decisu d’ùn micca trattà ch’è di cose chì si passanu in Corsica, dunque truvemu di tuttu...

-Quali sò, in fin di contu, i to leghjidori ? A sai ?

Difficiule à dì... D’appressu à e riazzioni in giru à noi, ci hè veramente di tuttu. Ci sò quelli chì sò avvezzi à parlà è leghje in corsu. È ci sò dinù giovani chì volenu amparà.
Ma a nostra riescita hè di vede ch’elli ci sò ghjente ch’ùn leghjenu micca d’abitutine u corsu hè chì venenu quantunque nant’à u blog. Vecu amichi mei ch’ùn anu mai cumpratu un libru in corsu, ch’ùn anu mai prununziatu una parolla di corsu è chì venenu ogni ghjornu à vede ciò ch’ellu ci hè nant’à A Piazzetta. Per mè hè questu u nostru più bellu successu.

-A Piazzetta t’ha un spiritu Bastiacciu bè marcatu chì quant’à ma ni faci u successu, mischiu di risa è di “puliticamenti scurrettu”, u rissenti ancu tu st’affari ? Ghjè calculatu ?

A Piazzetta hè un blog, ùn hè micca un situ d’infurmazioni fattu da giurnalisti prufessiunali. Sprimemu a nostra opinione chì hè persunale, ùn ingagia ch’è noi. Hè quessu l’interessu di u blog, ùn hè micca una scrittura “langue de bois”, sticchita. Scrivemu cum’è no semu, nant’à ciò chì ci face reagisce. Hè vera ch’è no semu scherzosi è stuzzicaghjoli. Hè u nostru sguardu, crìticu, nant’à stu mondu è nant’à a Corsica. È ci hè tantu à dì...

-300 visiti à ghjornu... Hè assai assai !!! Pudeti crescia dinò ?

Ùn hè micca troppu male per un blog lanciatu cinque mesi fà è ch’ùn hè scrittu ch’è in lingua corsa... È di siguru ch’è no speremu cresce ! Pensu chì s’è no femu qualcosa d’originale, qualcosa forse ch’ùn si trova micca ind’i media tradiziunali, a ghjente venerà, ancu s’elli ùn leghjenu micca u corsu. Seranu obligati di mettesi à amparà a nostra lingua !

-A sapeti s’è in Corsica l’utilizazioni di u Net pà ciò chì tocca à l’attualità hè ormai bè stallata ?

Mi pare di sì. Persunalmente l’attualità corsa a seguitu nant’à u net. Tutti i media sò presenti è Alta Frequenza, per esempiu, face un travagliu di prima trinca. Ma ghjustu à puntu, sò tutti media tradiziunali. Forse ci mancanu d’altri blog è siti chì cummenterianu l’attualità.

-Chi saria u soprapiù di u blog d’attualità par rapportu à i media tradiziunali ?

L’interessu di u blog hè ch’ellu porta una scrittura differente di a scrittura giurnalistica tradiziunale. Hè un antru tonu, più liberu. Si scrive di manera menu sticchita, menu furmale. Hè quessu l’interessu maiò di u web. Ùn ci hè ch’è da vede i blog di i giurnalisti : spessu ne dicenu di più nant’à i so blog persunali ch’è innù i so articuli.

-Cosa vi pudemi prigà pà l’avvena ? Alè, lentati !

Semu digià stati citati in u mensile Corsica, La Chaîne Parlementaire ci hà cuntattatu pè intervene in una di e so emissioni, è Corse-Matin hà ripigliatu una fottò magagna ch’è no aviamu traficatu, pensendu ch’ella era vera... Hà da esse difficiule di fà megliu, ma circheremu ! Noi, cuntinuveremu à stuzzicà...